Македонската влада ќе обезбеди чартер-летови за евакуација на македонските граѓани од кризните подрачја, а за шест граѓани кои побарале асистенција за извлекување од Израел ќе биде ангажиран државниот авион кој ќе ги преземе од Египет.
632 македонски државјани побарале помош за евакуација. Повеќето од нив се во Обединетите Арапски Емирати и ќе се вратат преку организирани чартер летови.
Министерството за надворешни работи и надворешна трговија на Северна Македонија соопшти дека се отворени линии за комуникација за сите граѓани на кои им треба асистенција, а се наоѓаат во некоја од погодените земји на Блискиот Исток.
„Безбедноста на македонските граѓани е највисок приоритет на Владата. Министерството за надворешни работи и надворешна трговија и понатаму пристапува одговорно, координирано и темелно во спроведувањето на сите активности поврзани со евакуацијата на граѓаните од погодените подрачја“, се наведува во соопштението на Министерството и се додава:
„Во таа насока, ја информираме јавноста дека, согласно со заклучокот на Владата, е започната постапка за јавна набавка за организација на чартер-летови со цел обезбедување безбедна евакуација.“
Од Министерството апелираат до сите македонски државјани кои се наоѓаат во погодените региони (Обединетите Арапаски Емирати, Катар, Бахреин и Кувајт), доколку сè уште не го сториле тоа, веднаш да контактираат со надлежното дипломатско-конзуларно претставништво или со СОС бројот на Министерството.
Министерството нагласи дека имајќи ја предвид итноста и фактот дека безбедносната состојба тековно се менува, постапката ќе се спроведе согласно со Законот за јавни набавки, со примена на скратени рокови предвидени за вакви ситуации.
„За реализација на оваа услуга се предвидени средства во износ до 60 милиони денари, обезбедени во буџетот на Министерството за надворешни работи и надворешна трговија. Во зависност од конечниот број на пријавени македонски државјани и бројот на чартер-летови што ќе се реализираат, можно е да биде искористен само дел од предвидениот износ“, се вели во соопштението.
