Македонското Собрание денеска со 67 гласа „за“ и 13 „против“ го избра Зулфиќар Зејнула, претседател на Демократската партија на Турците, за нов министер без ресор во Владата.

Премиерот Христијан Мицкоски, образложувајќи го предлогот, истакна дека изборот на Зејнула е дел од политиката на партнерство, меѓусебна доверба и заедничка одговорност за иднината на државата.

„Токму затоа денес го предлагам Зулфикар Зејнула за министер без ресор. Овој предлог е дел од една поширока политика што ја водиме од самиот почеток - политика на партнерство, меѓусебна доверба и преземање заедничка одговорност за иднината на државата“, посочи Мицкоски.

Новиот министер без ресор во периодот од 2021 до 2024 година ја извршуваше функцијата заменик-директор на Дирекцијата за заштита и спасување, а претходно беше советник во Општина Гостивар и работеше во Правниот сектор на Демократската партија на Турците на Македонија.

За својата работа е добитник на државно одликување за исклучителна пожртвуваност, доделено од Република Туркије.

Зејнула е дипломиран криминалист, со завршено високо образование на Факултетот за безбедност при Универзитетот „Свети Климент Охридски“ - Битола.

Со неговиот избор се заокружува реконструкцијата на Владата, во рамките на која на 13 јули беа избрани осум нови министри.