Американски авион KЦ-135 се урна во западен Ирак, додека втор авион вклучен во инцидентот слета безбедно, според американската војска.

„Еден од авионите се урна во западен Ирак, а вториот слета безбедно. Ова не се должи на непријателски или пријателски оган“, се вели во соопштението на Централната команда на САД (ЦEТКOM), која е одговорна за американските сили на Блискиот Исток.

Транспортниот авион за надополнување на гориво KЦ-135 е барем четвртиот американски воен авион изгубен за време на војната против Иран, откако три Ф-15 беа соборени од пријателски оган над Кувајт.

„Централната команда на САД е свесна за загубата на американски авион за полнење гориво KЦ-135. Инцидентот се случил во пријателски воздушен простор за време на операцијата Епски бес, а спасувачките операции се во тек. Во инцидентот учествувале два авиона. Едниот од авионите се урна во западен Ирак, додека другиот слета безбедно. Повеќе информации ќе бидат достапни како што се развива ситуацијата. Ве молиме за ваше трпение додека собираме дополнителни детали и им даваме појаснувања на семејствата на воениот персонал“, соопшти ЦЕНТКОМ.

KЦ-135, кои се во употреба повеќе од 60 години, генерално имаат екипаж од тројца: пилот, копилот и трет кој управува со бумот што се користи за полнење гориво на други авиони, според американските воздухопловни сили.

Но некои мисии на KЦ-135 бараат навигатор, а авионот може да носи до 37 патници, се вели во информативниот лист на воздухопловните сили.

На почетокот на војната, која започна на 28 февруари, кувајтските сили по грешка соборија три американски ловци Ф-15Е, но сите шест члена на екипажот успеаја да се катапултираат.

Тој инцидент се случил за време на борба, вклучувајќи „напади од ирански авиони, балистички ракети и беспилотни летала“, соопшти воената команда во тоа време.