Националното биро за борба против корупцијата (НАБУ) на Украина и Специјализираното обвинителство за борба против корупцијата (САПО) поднеле обвинение против лидерот на партијата Баткившчина, поранешната премиерка Јулија Тимошенко, поради обид за поткуп на пратеници во Врховната рада на Украина.

Според соопштението на НАБУ и САПО, откако двете институции во декември 2025 година откриле случаи во кои неколку пратеници добиле мито за гласање по предлог-закони, Тимошенко почнала преговори со одредени пратеници за воспоставување систем на редовни нелегални плаќања во замена за лојално однесување за време на гласањето.

Истрагата утврдила дека не станува збор за еднократни договори, туку за механизам на континуирана соработка што вклучувал аванси и бил наменет како долгорочен договор.

Според НАБУ, во тој систем, пратениците би добивале упатства за тоа како да гласаат, а во некои случаи и упатства да се воздржат од гласање или воопшто да не учествуваат во гласањето.

ТАСС објави дека портпаролката на Специјализираното обвинителство, Олга Постолук, потврдила дека против Тимошенко се поднесени обвиненија според членот за поткуп на службено лице, а лидерката на Баткившчина се соочува со казна затвор од пет до 10 години.

Тимошенко, потврди дека во нејзината канцеларија во текот на ноќта биле спроведени „итни истражни дејствија“ по обвинение за поткуп, но таа категорично ги негираше сите обвиненија, објави Укринформ.

Тимошенко на својата Фејсбук страница изјави дека повеќе од 30 лица „без никакви документи всушност ја окупирале зградата и ги земале вработените како заложници“, додека службените материјали - вклучувајќи службени телефони, парламентарни документи и лични заштеди - биле конфискувани.

„Претресот е грандиозен ПР потег“, оцени Тимошенко, додавајќи дека обвиненијата немаат никаква врска со законот.