Спектакуларниот шведски скокач со стап Мондо Дуплантис постигна нов светски рекорд на третиот ден од Светското првенство во атлетика во Токио, Јапонија.

Дуплантис важеше за фаворит за златниот медал, иако Гркот Eманоил Каралис, кој блескаше во последните месеци со прескокнати 6,08 метри, но, се разбира, бèше многу далеку од претходниот светскиот рекорд на Дуплантис (6,29 метри).

И Каралис беше добар, скокна 6,00 во првиот обид, но остана на таа височина. 25-годишниот Швеѓанец лесно ги помина 6,00, 6,10 и 6,15 метри. Бронзениот медал го освои Куртис Маршал од Австралија, кој прескокна 5,95 метри.

По прескокнатите 6,15 метри и освоениот златен медал, Дуплантис ја нападна височината од 6,30 метри, која ја прескокна во третиот обид предизвикувајќи ерупција од задоволство на преполниот и бучен јапонски Национален стадион.

„Испадна подобро отколку што можев да замислам. Неверојатно чувство е да ви го дадам овој светски рекорд. Публиката беше толку гласна“ - рече тој во еуфорија.

За Дуплантис ова е 14-ти светски рекорд во неговата кариера. Почна со 6,17, а сантиметар по сантиметар стигна до круг од 6,30. И „патем“ ја освои својата трета титула светски шампион, заедно со два олимписки златни медали, три европски круни и неколку други медали и рекорди...