Севернокорејскиот лидер Ким Џонг Ун изјави дека ракетните тестови што ги спроведе земјата се „неопходни“ по „неодамнешната геополитичка криза и комплицираните меѓународни настани“.

Пјонгјанг лансираше хиперсонични ракети од округот Рјокфо во Пјонгјанг, во североисточен правец, погодувајќи цели на оддалеченост од 1.000 километри, објави државната телевизија КЦНА.

Ким рече дека лансирањето на ракетата потврдило дека е „извршена многу важна технолошка задача за националната одбрана“ и „покажала подготвеност на нуклеарните сили на ДНРК“.

Изјавите на Ким следеа по настаните во Венецуела каде беше извршен воен напад од САД и беше заробен венецеулскиот претседател Николас Мадуро.

„Неодамна се постигнати важни достигнувања во практичната подготовка на нашите нуклеарни сили и нивната подготовка за вистинска војна“, додаде тој, истакнувајќи дека Северна Кореја „мора постојано да ги надградува воените средства, особено офанзивните системи за оружје“, додаде Ким.

„Да бидам искрен“, рече Ким за време на лансирањето на ракетите, „нашата таква активност е јасно насочена кон постепено поставување на средството за одвраќање од нуклеарна војна на високо развиена основа“.

„Причината зошто е тоа неопходно е илустрирана со неодамнешната геополитичка криза и комплицираните меѓународни настани“, нагласи тој.