Пет земји од ЕУ бараат привремени ограничувања на правото на глас на новите земји-членки, информираат медиумите од Брисел.

Белгија, Холандија, Луксембург, Франција и Германија повикуваат на „длабинска дискусија“ за привремено ограничување на правото на глас на новите земји-членки, се вели во нонпејпер до кој стигнале медиумите.

Мерката е предвидена како преоден механизам за одлуки за кои е потребна едногласност, вклучувајќи ја надворешната политика и повеќегодишниот буџет на ЕУ.

Петте земји рекоа дека сакаат „да градат врз лекциите научени од претходните рунди на проширување“.

Тие предложија „каталог“ на опции што би можеле да бидат прилагодени на специфичните предизвици што ги поставуваат земјите-кандидатки и вклучени во идните договори за пристапување.

Предлогот има за цел да обезбеди ЕУ да продолжи ефикасно да функционира додека новите земји-членки се придржуваат кон основните вредности на блокот.

Петте земји, исто така, бараат дополнителни заштитни мерки против кршење на владеењето на правото, демократските принципи и слободата на печатот, вклучително и евентуално суспендирање на соработката на различни нивоа.

Тие, исто така, бараат обврзувачка клаузула што ќе дозволи „заштитни мерки“ ако новата земја-членка покаже „сериозна регресија“ во стандардите за владеење на правото во текот на првите години по пристапувањето.