Можноста лидерката на крајната десница Марин Ле Пен да победи на претседателските избори во Франција, ветувајќи дека ќе се вклучи во директен конфликт со Европската Унија, веќе предизвикуваат немири во Брисел и фрлаат сенка врз последните месеци на власт на Емануел Макрон, објавува француската новинска агенција АФП.

Франција оди на избори во април и мај, по што Макрон ќе се повлече од функцијата претседател на втората по големина економија во ЕУ, бидејќи законски е ограничен на два мандата.

Но додека Макрон беше на состанок со колегите лидери од ЕУ во Брисел, еден европски дипломат забележа дека Ле Пен веќе е во просторијата. Потенцијалната победа на фаворитот веќе фрли сенка врз разговорите во четврток и петок за идните трошоци на унијата и за Украина.

Во обид да го зголеми притисокот врз ЕУ, Ле Пен пристигна во белгиската престолнина пред состанокот на лидерите за да се обрати на медиумите, ветувајќи дека драстично ќе го намали придонесот на Франција во буџетот на ЕУ и ќе ја намали финансиската помош за Украина.

Европските претставници се загрижени дека Ле Пен неколку месеци пред изборите се обидува да влијае на прашањата поврзани со ЕУ.

„Беше многу паметно од неа што одржа прес-конференција еден ден претходно, рече друг европски дипломат, кој побара да не биде именуван.

Лидерката на партијата Национален собир, исто така, даде опсежно интервју за Фајненшл тајмс, весник што го читаат носителите на одлуки во Брисел, предупредувајќи за можен судир околу буџетот на ЕУ и за тешките времиња што би можеле да ја очекуваат шефицата на ЕУ, Урсула фон дер Лајен, ако Ле Пен победи на изборите.

Интервјуто беше доста застрашувачко, особено делот за Украина, вели Франческо Николи, професор по политички науки на Политехничкиот универзитет во Торино.

Еден висок европски функционер призна дека во Брисел тешко можат да замислат како би изгледала ЕУ со француска крајно десничарска влада, особено затоа што досега не се евидентирани никакви официјални контакти меѓу Ле Пен и извршната власт на ЕУ.

Потенцијална бура

Плашејќи се од вознемирувачки претседателски мандат за Марин Ле Пен, Макрон го насочи своето внимание кон она што сè уште може да го постигне на ниво на ЕУ во последните месеци од неговиот мандат.

Дипломатите велат дека тврдокорниот европски застапник, кој помина девет години работејќи кон подлабока интеграција во ЕУ, сè уште го задржува влијанието врз своите колеги во Брисел и покрај низата кризи дома, од студентски протести до проблемот со долгот на Франција.

Она што е сигурно е дека во Брисел постои волја максимално да се искористи фактот дека тој е сè уште таму и да се обезбеди сè што е можно пред можна бура, рече Себастијан Мајар од Институтот Жак Делор.

Набљудувачите велат дека ниту еден друг актуелен лидер на ЕУ не успеал да ја преземе водечката улога во блокот, а германскиот канцелар Фридрих Мерц е послаб од кога било по најголемата победа на крајната десница во Германија од 1945 година.

„Макрон разбира што се случува на масата (на лидерите). Тој е многу вешт преговарач и многу поагилен од Мерц“, рече еден дипломат на ЕУ.

Макрон помеѓу европското влијание и домашните проблеми

Инсајдерите во ЕУ велат дека на Макрон ќе му треба целата негова генијалност за да излезе како победник од напнатите преговори за буџетот меѓу таканаречените штедливи земји предводени од Берлин и главните градови како Париз, кои се залагаат за поамбициозен буџет.

Мајар вели дека францускиот претседател изградил меѓународен углед што, до одреден степен, би можел да го заштити од тешкотиите со кои се соочува Франција дома.

Експертот укажува на влијанието на Макрон во преговорите за наследникот на Кристин Лагард на чело на Европската централна банка, како и во преговорите за буџетот на ЕУ.

Сепак, не се сите убедени. Кога станува збор за надворешната и безбедносната политика, Макрон во моментов е во силна позиција. Но кога станува збор за економијата, тој е слаб, според Николи.

Самиот француски лидер, можеби сакајќи да ја спречи Марин Ле Пен дополнително да ги засени неговите разговори на самитот, не одговори на прашањата на новинарите во Брисел во четврток.

„Мислам дека затоа Макрон се држи настрана. Тој не сака да дава одговори“, рече дипломатски извор.

Извор: АФП