Најбогатиот човек во светот, Илон Маск, денес изјави дека роботите и вештачката интелигенција (ВИ) ќе можат да ги задоволат сите човечки потреби во блиска иднина и дека предвидува дека ќе има повеќе роботи отколку луѓе во светот, и дека секој човек ќе има или ќе сака да има еден.

„Ова значи дека во одреден момент нема ни да можете да сфатите што да побарате од робот. Ќе има толку изобилство на стоки и услуги“, рече Маск во разговор со копретседателот на Управниот одбор на Светскиот економски форум, Лари Финк во Давос.

Кога го прашале како ја гледа целта на човечкото постоење во такво сценарио, Маск вели дека изобилството за секого е невозможно, но дека, и покрај ова, е многу оптимист.

„Мислам дека секој на Земјата ќе има хуманоиден робот и ќе посака еден. Кој не би посакал робот кој, под претпоставка дека е многу безбеден, ќе се грижи за вашите деца и ќе се грижи за вашето домашно милениче или за вашите постари родители“, додаде тој.

Маск изјави дека целта на компанијата Спејс X (SpaceX) е да ја зголеми веројатноста цивилизацијата да има светла иднина и „дека животот и свеста ќе се прошират надвор од Земјата“.

„Спејс X е во бизнисот со унапредување на ракетната технологија до точка каде што можеме да го прошириме животот и свеста надвор од Земјата - до Месечината, до Марс и на крајот до други ѕвездени системи. Мислам дека секогаш треба да гледаме на свеста и животот каков што го знаеме како нешто кревко и деликатно, бидејќи според нашето најдобро знаење не знаеме за постоењето на живот никаде на друго место“, рече Маск.

Како што изјави, луѓето често му го поставуваат прашањето „дали има вонземјани на Земјата“?.

„Често ме прашуваат: дали има вонземјани меѓу нас? И јас велам - јас сум еден од нив. Не ми веруваат“, додаде тој.

Тој исто така истакна дека „ако некој во светот би знаел дали постојат вонземјани, тоа би бил тој“.

„Имаме 9.000 сателити таму горе и ниту еднаш не моравме да маневрираме за да избегнеме вонземски вселенски брод“, рече Маск.

Маск изјави дека е важно животот да биде мултипланетарен, така што ако има природна или вештачка катастрофа на Земјата, свеста ќе продолжи да постои.

„Тоа е целта на Спејс X“, рече Маск.

Зборувајќи за можноста за запирање на стареењето, Маск изјави дека тоа ќе биде можно кога ќе се открие причината за стареењето.

„Сите клетки во вашето тело, знаете, со неколку мали исклучоци, стареат со практично иста брзина. Никогаш во мојот живот не сум видел некој со стара лева рака и млада десна рака. Па зошто е тоа така? Тоа значи дека мора да има некаков синхронизирачки часовник што е усогласен низ сите 35 билиони клетки во вашето тело“, рече Маск.

Како што вели тој, смртта е корисна на некој начин.

„Постои причина зошто всушност немаме подолг животен век. Ако луѓето живеат вечно или многу долго, мислам дека постои одреден ризик од општествена стагнација, работите да станат некако вкочанети и заклучени на едно место, а тоа би можело да стане задушливо, само да им недостасува живост“, рече тој.

Тој истакна дека е многу веројатно да се најде начин да се продолжи животниот век.