Американскиот потпретседател Џеј Ди Венс ја отфрли можноста за војна без крај во Иран, изразувајќи уверување дека претседателот Доналд Трамп ќе ги оствари целите на САД.

„Има уште многу работи на кои треба да работиме, но едно нешто може да ви кажам: ако сте загрижени за уште една вечна војна, Доналд Трамп никогаш тоа нема да го дозволи“, изјави Венс за „Фокс њуз“.

Тој укажа на разликата меѓу критикувањето на неуспешните воени авантури во странство и „тврдењето дека американската војска никогаш, под никакви околности, не смее да се користи“.

„Тој ќе ги оствари целите на Америка, а потоа ќе се фокусираме на другите работи што ги правиме“, додаде Венс.

Изјавите се дадени во услови на тековните тензии меѓу Иран и САД по избувнувањето на конфликтот на 28 февруари, кога САД и Израел започнаа напади врз Иран, по што Техеран возврати со напади врз Израел и американските позиции низ арапските земји.

САД и Иран во јуни потпишаа рамковен договор, по што започнаа преговори, но подоцна разговорите пропаднаа поради несогласувањата околу слободата и непреченото пловење низ Ормускиот Теснец, клучна маршрута за глобалниот транспорт на енергенти и стоки.