Министерот за животна средина и просторно планирање, Муамет Хоџа, денес одржа работен состанок со амбасадорот на Република Туркије во Република Северна Македонија, Фатих Улусој, на кој разговараа за можностите за подобрување и продлабочување на билатералната соработка, со посебен фокус на животната средина.

На средбата, министерот Хоџа изрази искрена благодарност за долгогодишната и континуирана поддршка што Република Туркије ѝ ја дава на Република Северна Македонија од нејзиното осамостојување, нагласувајќи ја важноста на партнерството меѓу двете земји во спроведувањето на заеднички иницијативи и проекти.

Соговорниците разговараа и за претстојниот Форум за вода, кој ќе се одржи на 5 и 6 мај во Истанбул, со учество на министерствата за животна средина на земјите од Западен Балкан, како и за одржувањето на 31-та Конференција на страните (ЦOП31), најважниот глобален самит за климатски промени под покровителство на Обединетите нации, кој ќе се одржи во Анталија, Република Туркије.

На крајот од средбата, министерката Хоџа изрази верување дека билатералната соработка меѓу Северна Македонија и Туркије ќе продолжи да се развива, придонесувајќи за зајакнување на меѓусебните односи и интензивирање на размената на знаења и искуства од заемен интерес.