Унгарскиот премиер Петер Маѓар ја поддржа познатата шаховска велемајсторка Јудит Полгар како кандидатка за претседател, изјавувајќи вчера дека денес ќе се сретне со неа за да разговараат за оваа функција.

Маѓар ја објави својата поддршка откако истакнати личности од унгарските научни, културни и спортски заедници му пратија писмо на претседателот на Парламентот, Агнеш Форстхофер, предлагајќи ја Полгар за претседателка.

„Нашата земја има потреба од единство, мир и претседател со кој секој Унгарец може да се гордее“, напиша Маѓар на платформата за социјални медиуми Х.

Маѓар изјави дека ќе ја праша Полгар дали е подготвена да „ѝ служи на земјата во нова улога“ сè до донесувањето на новиот устав на Унгарија.

Тој ја опиша Полгар како личност чии достигнувања заслужија почит дома и меѓународно, наведувајќи дека нејзиното признание е резултат на нејзиниот талент, напорна работа, истрајност и интегритет, а не на политички припадности.

Полгар, која низ светот се смета за најдобра шахистка во историјата, непрекинато беше на врвот на светската ранг-листа за жени во текот на 26 години, а исто така се најде меѓу десетте најдобри на целокупната глобална ранг-листа.

Таа е меѓународна велемајсторка и петкратна шампионка на Шаховската олимпијада.

Полгар, исто така, го има добиено унгарскиот Орден на свети Стефан, највисока државна награда во земјата, а неодамна беше избрана и за соработник на колеџот „Крајст“ при Универзитетот во Кембриџ.

Процесот на избор на нов претседател следува по уставниот амандман, изгласан на 13 јули, со кој се завршува мандатот на претседателот Тамаш Шуљок пред неговиот закажан завршеток.

Амандманот предвидува дека Шуљок, кој е на функцијата од март 2024 година, ќе го заврши својот мандат денот по неговото стапување во сила, а потоа парламентот ќе има 30 дена да избере нов шеф на државата, чиј мандат не треба да надминува пет години.

„Отворена тиранија дојде во Унгарија поради постапките на премиерот Петер Маѓар и партијата Тиса, соопшти опозициската партија Фидес на поранешниот премиер Виктор Орбан, коментирајќи го фактот дека претседателот Шуљок го потпишал амандманот на уставот со кој му се завршува мандатот.

Според Фидес, Маѓар и партијата Тиса извршиле насилен напад врз претседателот на начин без преседан во Европската Унија, го ставиле во недостоинствена положба, извршиле притисок врз него и конечно го отстраниле од функцијата доброволно.

„Ова е без преседан во Унгарија, од најтемните диктатура. Ако ова може да му се направи на претседателот денес, тогаш утре може да му се направи на секого во Унгарија“, рекоа од Фидес.