Британската влада денес објави пакет од 31 нова санкција против Русија, додека Обединетото Кралство го засилува економскиот притисок пред почетокот на зимата.

Во соопштението, Министерството за надворешни работи наведе дека 31-та нова мерка вклучува санкционирање на „бродови од ’флотата во сенка’ за течен природен гас (LNG), мрежи на Кремљ за ширење дезинформации и сторители на тортура врз цивили и индоктринација на деца“.

„Потегот уследи откако Русија во септември лансираше над 3.100 беспилотни летала со млазен погон кон Украина, надминувајќи го својот мрачен воен рекорд од август“, се истакнува во соопштението.

Санкциите опфаќаат осум лица вклучени во „произволното лишување од слобода, тортурата и лошиот третман“ на украински цивили, се додава во соопштението.

Исто така, се наведува дека на мета се уште седум поединци поради нивната улога во „индоктринацијата и милитаризацијата“ на украинските деца, вклучително и оние депортирани од руските власти.

„Ние се насочуваме и кон приходите што помагаат да се одржи руската агресија и кон сторителите на ужасни злосторства врз украинските цивили, вклучително и децата. Обединетото Кралство нема да се откаже од поддршката за Украина“, изјави во соопштението министерот за Европа, лорд Вуд од Енфилд.

Владата на Обединетото Кралство истакна дека новите мерки ја покажуваат решеноста на земјата, заедно со партнерите, да ги повика на одговорност оние што се виновни за „руската државна агресија“ врз Украина, да ги ограничи приходите што ја одржуваат војната и да ја брани безбедноста на Украина, Обединетото Кралство и Европа.

„Иако Обединетото Кралство не бара конфронтација со Русија, сè додека (претседателот Владимир) Путин не одлучи да ја прекине својата бесмислена и варварска војна, поддршката на Обединетото Кралство за Украина ќе остане непоколеблива“, се додава во соопштението.