Соединетите Американски Држави и нeјзините сојузници се судрија со Русија и Кина во Обединетите нации околу нуклеарните намери на Иран, додека Вашингтон се обидува дополнително да ја оправда војната што ја започна против Иран пред две недели.
На состанокот на 15-члениот Совет за безбедност на ОН, со кој овој месец претседаваат САД, Русија и Кина неуспешно се обидоа да ја блокираат дискусијата за комитет формиран за надгледување и спроведување на санкциите на ОН врз Иран.
Обидот беше отфрлен со гласање од 11:2 и двајца воздржани.
Обраќајќи се пред советот, американскиот претставник во Обединетите нации, Мајк Валц, ги обвини Москва и Пекинг дека се обидуваат да го заштитат Техеран со попречување на работата на таканаречениот Комитет 1737.
„Сите земји-членки на Обединетите нации треба да спроведат ембарго за оружје против Иран, забранувајќи го трансферот и трговијата со ракетна технологија и замрзнувајќи ги релевантните финансиски средства“, рече Валц.
„Одредбите на ОН што треба повторно да се воведат не се произволни, туку се со тесен опсег за да се справат со заканата што ја претставуваат нуклеарните, ракетните и конвенционалните програми за оружје на Иран и континуираната поддршка на Иран за тероризмот.“
Валц рече дека Русија и Кина се спротивставуваат на функционалниот комитет за санкции „затоа што сакаат да го заштитат својот партнер, Иран, и да продолжат да ја одржуваат одбранбената соработка што сега е повторно забранета“.
Тој исто така рече дека Меѓународната агенција за атомска енергија на ОН неодамна повторила дека Иран е единствената земја без нуклеарно оружје што произведувала и акумулирала ураниум збогатен до 60 проценти и одбила да ѝ обезбеди на агенцијата пристап до залихите.
Контраобвинувања
Рускиот амбасадор во ОН, Василиј Небензја, ги отфрли тврдењата, обвинувајќи ги САД и нивните сојузници за поттикнување на она што го опиша како хистерија околу нуклеарните амбиции на Иран.
„Ова беше направено со цел да се преземе уште еден воен потфат против Техеран и да се обезбеди голема ескалација на ситуацијата на Блискиот Исток и пошироко“, рече тој.
Кинескиот претставник во ОН, Фу Конг, слично го критикуваше Вашингтон, нарекувајќи ги САД „поттикнувач“ на иранската нуклеарна криза.
Тој рече дека САД прибегнале кон „бесрамна употреба на сила против Иран за време на преговарачкиот процес“, што, според него, ги поткопало дипломатските напори.
Амбасадорот на Иран во ОН, Амир Саид Иравани, подоцна им изјави на новинарите дека нуклеарната програма на Техеран „отсекогаш била исклучиво мирољубива“ и дека Иран нема да признае никаков обид за повторно воведување санкции.
Американскиот претседател Доналд Трамп постојано ја наведува нуклеарната програма на Иран како оправдување за војната.
Тој претходно овој месец изјави дека Иран ќе добиел нуклеарно оружје во рок од две недели доколку САД не ги нападнеле трите клучни нуклеарни постројки во јуни, иако изворите велат дека тврдењето не е поткрепено со проценките на американските разузнавачки служби.
Велика Британија и Франција му рекоа на Советот за безбедност дека повторното воведување санкции врз Иран е оправдано со неуспехот на Техеран да одговори на меѓународните загрижености за неговите нуклеарни активности.
