Кина денес се спротивстави на усвојувањето од страна на американскиот Конгрес на голем закон со санкции насочени кон Русија, истакнувајќи дека билатералните трговски односи „не треба да бидат нарушени“ од трета страна.

„Кина остварува економска и трговска соработка со земјите врз основа на еднаквост и заемна корист“, изјави портпаролот на Министерството за надворешни работи, Гуо Џиакун, за новинарите во Пекинг.

Тој одговори на прашање во врска со законскиот предлог усвоен во американскиот Конгрес, со кој се предвидуваат задолжителни санкции за високи руски функционери, вклучително и претседателот Владимир Путин, како и за олигарси, државни компании и странски бизниси што ја поддржуваат руската одбранбена индустрија.

Гуо, сепак, рече дека соработката на Кина „не е насочена кон трета страна и не треба да биде нарушена под притисок на која било трета страна“.

„Ние секогаш се спротивставуваме на екстериторијалната јурисдикција што нема основа во меѓународното право или овластување од Советот за безбедност на ОН“, нагласи тој.

Билатералната трговија меѓу Кина и Русија со години бележи раст, достигнувајќи над 240 милијарди долари во 2024 година, а најголем дел од трговијата се одвива во националните валути.

Претставничкиот дом на американскиот Конгрес вчера го усвои законскиот предлог со 262 гласа „за“ и 159 „против“, при што десетици демократи им се придружија на републиканците.

Сега мерката оди кај американскиот претседател Доналд Трамп на потпис.

Со законодавството ќе ѝ се овозможи на администрацијата на Трамп да воведе царини до 100% за земјите што купуваат руска нафта и гас, меѓу кои Кина и Индија.