Од полноќ важат нови малопродажни цени на нафтените деривати, соопшти Регулаторната комисија за енергетика, водни услуги и услуги за управување со комунален отпад.

Одлуката на Регулаторната комисија предвидува намалување на цената на бензините за 1,5 денар за литар. Така, ЕУРОСУПЕР БС-95 ќе се продава по 99 денари, а БС-98 по 101 денар за литар.

Од друга страна, дизелот поскапува за 5,50 денари, па новата цена на ЕУРОДИЗЕЛ ќе изнесува 104,50 денари за литар.

Се намалува и цената на екстра лесното масло за домаќинство (ЕЛ-1) за 7 денари, односно на 102,5 денари за литар.

Мазутот М-1 НС поскапува за 1,835 денари, па неговата нова цена ќе изнесува 50,078 денари за килограм, соопшти РКЕ.

Од Регулаторната комисија објаснуваат дека промената на цените е поврзана со движењата на светските пазари. Во текот на изминатата недела, цената на рафинираниот дизел на медитеранската берза се зголемила за 7 проценти.

Дополнително влијание имало и движењето на курсот на американскиот долар, кој во однос на денарот зајакнал за 1 процент.