Иранскиот претседател Масуд Пезешкијан денес изјави дека врховниот лидер на Иран, Моџтаба Хамнеи, ѝ дал на владата „одредени овластувања“ во врска со мировните преговори со Вашингтон, објавија иранските државни медиуми.

Пезешкијан изјави дека Техеран сака да го реши конфликтот со САД преку дијалог, со поддршка и согласност од врховниот лидер, објавува „Иран Интернешнл“.

Но врховниот лидер на Иран, Моџтаба Хамнеи, претходно ѝ наредил на иранската војска ефикасно да одговори на сите закани, истакнувајќи дека одговорот не треба да биде ограничен од географијата.

Тој, исто така, наредил ажурирање на списокот на цели, така што сите видови американски материјални и нематеријални средства ќе бидат во дометот на иранските вооружени сили.

„Се обидуваме да го решиме проблемот, односно конфликтот со САД, преку преговори. Врховниот лидер на револуцијата ѝ даде на владата соодветни овластувања во врска со тоа прашање“, рече Пезешкијан, објави неговата прес-служба.

На 28 февруари, САД и Израел започнаа напади врз цели во Иран, на кои Техеран одговори со свои напади.

Кон средината на јуни, Иран и САД потпишаа меморандум за прекин на непријателствата, но подоцна повторно разменија напади, а конфликтот до ден-денес не е решен.

Техеран претходно објави дека му понудил на Вашингтон план од седум услови, кој предвидува можност за отворање на Ормускиот Теснец во замена за укинување на поморската блокада и ограничувањата за извоз на иранска нафта.

Американскиот претседател Доналд Трамп го отфрли тој предлог.

Иранското Министерство за надворешни работи потоа објави дека го добило одговорот на САД за предложениот план и дека, преку Катар, ја пренело својата проценка за тој одговор до Вашингтон.