Групација од 21 голема глобална финансиска институција, меѓу кои Банк оф Америка, Велс Фарго, Дојче банк и УБС, соопшти дека планира да основа заедничка компанија што ќе го поддржува издавањето стабилни криптовалути.
Компанијата, која сè уште нема име, се очекува да биде основана во втората половина на 2026 година, по завршувањето на потребните постапки, се наведува во заедничкото соопштение објавено вчера.
Планирано е да работи на глобално ниво, а првично да се фокусира на издавање стабилна криптовалута деноминирана во американски долари, која треба да се појави на пазарот во првата половина на 2027 година.
Групацијата има намера подоцна да го прошири проектот со стабилни криптовалути деноминирани во други валути на земјите од Групата седум (Г7), при што понудата деноминирана во евра е посочена како приоритет.
Предложената стабилна криптовалута би можела да се користи на големопродажните, институционалните и малопродажните пазари, вклучително и за прекугранични плаќања и порамнување на трансакции со дигитални средства.
Групацијата соопшти дека проектот ќе се потпира на експертизата на учесниците во областа на усогласеноста со регулативите, управувањето и управувањето со ризици, како и дека, каде што е применливо, ќе биде усогласен со американскиот закон ГЕНИУС и регулаторната рамка на Европската Унија за пазари на криптосредства.
Проектот следува по најавата од октомври 2025 година, кога 10 банки соопштија дека ја разгледуваат можноста за издавање форма на дигитални пари обезбедени со резерви, достапни на јавни блокчејн-мрежи.
Проширената групација ја сочинуваат Банк оф Америка, Капитал Уан, Cити, Фиделити инвестментс, Голдман Сакс, Пи-Eн-Cи фајненшл сервисис, Скотиабанк, Ти-Ди банк груп, Велс Фарго и ВиздомТри од Северна Америка.
Европските учесници се Банко Сантандер, ББВА, Комерцбанк, Кредит Агрикол, Дојче банк, Лојдс банкинг груп, Рабобанк и УБС.
Јапонската МУФГ банк, Сириус интернешнл холдинг со седиште во Абу Даби и јужноафриканската Стандард банк, исто така, учествуваат во проектот.
Стабилните криптовалути се дигитални средства дизајнирани да одржуваат стабилна вредност преку нивно врзување за конвенционални средства, најчесто валути како американскиот долар.
Тие сè повеќе се разгледуваат за плаќања и порамнувања бидејќи трансакциите базирани врз блокчејн може да се одвиваат деноноќно и преку границите.
