Претседателот на Црна Гора, Јаков Милатовиќ, свика за понеделник, 31 август, итна седница на Советот за одбрана и безбедност, откако премиерот Милојко Спајиќ изнесе наводи за постоење сериозни безбедносни информации за координирано хибридно дејствување чија цел е дестабилизација на државата.

Од Кабинетот на претседателот соопштија дека на седницата ќе бидат поканети челниците на безбедносниот сектор, од кои ќе бидат побарани прецизни информации за сите изнесени наводи, како и целосна проценка на безбедносната состојба.

„Претседателот на Владата вчера соопшти дека постојат сериозни оперативни безбедносни информации за координирано хибридно дејствување чија цел е дестабилизација на Црна Гора. Имајќи ги предвид тврдењата изнесени од премиерот за такво дејствување, се поставува прашањето што преземаат надлежните институции во врска со тоа“, се наведува во соопштението.

Од Кабинетот на претседателот изразија дополнителна загриженост поради медиумските наводи дека висок функционер во Владата е под влијание на лица од криминални структури.

„Јавноста има право да знае за кој функционер станува збор и кој ја сноси одговорноста доколку таквите сознанија биле познати при неговото именување или за време на извршувањето на функцијата, како и што презеле надлежните институции“, се наведува во соопштението.

Во исто време, од Кабинетот порачаа дека сериозните безбедносни прашања не смеат да се користат за дневнополитички цели ниту за политички пресметки.

„Прашањата што се однесуваат на безбедноста и стабилноста на државата мора да се разгледуваат одговорно, врз основа на факти и преку институциите на системот“, се заклучува во соопштението.

Црногорскиот премиер Милојко Спајиќ вчера соопшти дека добил сериозни информации од безбедносниот сектор дека исполнувањето на условите за полноправно членство на Црна Гора во ЕУ ќе биде проследено со координирани хибридни напади врз земјата, во кои, како што рече, се вклучени функционери на најмалку две држави од регионот.