Израелската aрмија во доцните часови синоќа гранатираше делови од периферијата на селото Ал-Самданија ал-Шаркија во јужната сириска покраина Кунејтра, соопшти сириската државна новинска агенција САНА.

Две артилериски гранати паднале на земјоделски површини во околината на селото, при што немало повредени лица.

Претходно сириската телевизија „Ал-Ихбарија“ објави дека израелските сили ослободиле млад човек кој претходно бил приведен во Џубата ал-Хашаб откако се здобил со повреди.

Не беа соопштени дополнителни детали за неговиот идентитет или за околностите под кои бил приведен.

Гранатирањето уследи по еден ден откако израелските сили извршија два упада во јужниот дел на Кунејтра.

Израел спроведува повеќекратни гранатирања и копнени упади во јужна Сирија по падот на режимот на Башар ал-Асад во декември 2024 година.

Дамаск во повеќе наврати побара повлекување на израелските сили од сириската територија и ја потврди својата посветеност кон Договорот за неангажирање на силите од 1974 година.