Управата на Панамскиот канал би можела дополнително да го ограничи транзитот на бродови поради сушата предизвикана од временскиот феномен Ел Нињо, предупреди директорката Иља Еспино де Марота во интервју за АФП.

Панама веќе прогласи вонредна состојба поради феноменот што се развива над Тихиот Океан и влијае на глобалните временски услови и ги зголемува температурите низ целиот свет.

Се предвидува дека овогодинешниот Ел Нињо ќе биде најсилниот откако започнаа евиденциите пред четири децении, забележува АФП.

Од почетокот на војната во Иран и блокадата на Ормускиот Теснец, сообраќајот во Панамскиот канал значително се зголеми, бидејќи превозниците бараат алтернативни патишта за снабдување со енергија.

Управата на Панамскиот канал, која управува со пет проценти од светската поморска трговија, веќе го намали максималниот број бродови во дневен транзит, од 36 во август на 32 до средината на септември.

Транзитот на бродови низ каналот е овозможен од дождовницата што се собира во два резервоари, но нивното ниво веќе се намали поради сушата што ја донесе Ел Нињо.

Доколку нема доволно вода, структурите што ги креваат и спуштаат бродовите на почетокот и на крајот од преминот низ каналот не можат да функционираат.

Шефицата на Управата за Панамскиот канал во понеделник за АФП изјави дека може да воведе дополнителни мерки ако сушата продолжи.

„Не ја исклучуваме можноста дека во февруари или март можеби ќе мора дополнително да го заостриме ограничувањето, веројатно не на 24 бродови дневно, туку можеби на 29 или слично“, изјави Де Марота за француската новинска агенција.

Стотици милиони литри вода

За премин на еден брод се потребни приближно 200 милиони литри вода, која потоа се испушта во морето. Во 2023 година, Управата за Панамскиот канал беше принудена да го намали бројот на бродови во дневен транзит од 38 на 22, бидејќи Ел Нињо драстично ги намали нивоата на водата во акумулациите.

Ограничувањата нема да бидат толку драстични, проценува шефицата на администрацијата. Покрај намалувањето на бројот на бродови во дневен транзит, управата на каналот ја намали и максималната дозволена длабочина на газалиштето на бродовите од 15,2 метри на 14,6 метри.

Газалиште е вертикалното растојание помеѓу водната линија и најниската точка на трупот на бродот и ја мери количината на вода потребна за бродот безбедно да помине низ каналот. Ограничувањето на газалиштето ќе принуди некои бродови да ја намалат количината на товар пред транзитот.

Експертите предупредуваат дека долгорочните ограничувања за транзит низ Панамскиот канал би можеле да ги зголемат трошоците за превоз на стоки и да го продолжат времето на испорака.

Соединетите Американски Држави и Кина се главни корисници на каналот, најкратката морска рута помеѓу источниот брег на Соединетите Американски Држави и Кина.

Каналот, кој ги поврзува Атлантскиот и Тихиот Океан, носи околу 40 проценти од американскиот контејнерски сообраќај.