Азербејџан не гледа никаква пречка за конечно потпишување мировен договор со Ерменија доколку Ереван од својот Устав ја отстрани одредбата што Баку ја смета за територијална претензија кон Азербејџан, изјави висок советник на азербејџанскиот претседател.

Хикмет Хаџиев, советник за надворешна политика на азербејџанскиот претседател Илхам Алиев, за Агенција Анадолија говореше на маргините на програмата посветена на мирот, обновата и регионалната соработка на Јужен Кавказ.

Хаџиев рече дека Азербејџан внимателно ги следи напорите на Ерменија за изработка на нов Устав по изборите во земјата.

„Во Уставот на Ерменија постои одредба што содржи територијална претензија кон Азербејџан. Очекуваме таа да не биде вклучена во новиот Устав, односно да биде отстранета. Такви намери постојат и на ерменска страна“, изјави тој.

„Доколку во Ерменија се одржи референдум, биде усвоен новиот Устав и таа одредба биде отстранета, не гледаме никаква пречка или проблем за конечно потпишување на мировниот договор“, додаде Хаџиев.

Зангезурски коридор

Тој оцени дека во регионот веќе постои де факто атмосфера на мир и дека продолжуваат напорите за воспоставување траен мир меѓу двете земји.

Хаџиев изјави и дека Азербејџан од темел реконструира девет града и 300 села во Карабах.

Тој посочи дека за краток период се изградени илјадници километри патишта, како и мостови и тунели, а околу 60.000 луѓе веќе живеат, работат и студираат во регионот.

Заканата од нагазни мини и понатаму претставува голем предизвик, рече тој, додавајќи дека операциите за деминирање овозможуваат жителите постепено да се враќаат во градовите и населените места.

„Во процес сме Карабах, кој и природно е рај, да го претвориме во вистински рај“, рече Хаџиев

Во врска со предложениот Зангезурски коридор, Хаџиев изјави дека сигналите од Ерменија и САД укажуваат дека студиите за изводливост се при крај и дека изградбата би можела да започне уште оваа година.

Тој наведе дека автопатот од Баку до Зангилан е при крај, а дека и железничката линија е речиси завршена.

Исто така, додаде дека железничката инфраструктура во азербејџанската Автономна Република Нахчиван се обновува, а Туркије ја гради железничката линија Карс–Игдир.

„По завршувањето на овие проекти ќе биде воспоставена железничка врска меѓу Нахчиван и Туркије“, рече тој.

„Очекуваме Ерменија и САД да го започнат процесот на изградба на проектот што тие го нарекуваат Зангезурски коридор, односно коридор на Трамп“, изјави Хаџиев.

Односите меѓу Туркије и Азербејџан

Хаџиев ги опиша односите меѓу Туркије и Азербејџан како историско братство наследено од претходните генерации.

Тој рече дека обидите да се нарушат односите меѓу двете земји претставуваат „валкана пропаганда“ и нема да успеат.

„Ги нарекувам предавници сите што се обидуваат да ги поткопаат односите меѓу Туркије и Азербејџан. Без разлика дали се во Туркије или во Азербејџан, оние што имаат таква намера никогаш нема да ги постигнат своите цели“, изјави Хаџиев.

Тој додаде дека билатералните односи ќе продолжат да се зајакнуваат благодарение на волјата на двата народа и лидерството на претседателите на двете земји.

Извор: АА