Гардијан: Џ.Д. Венс би можел да ја предводи американската страна во разговорите со Иран

Пакистан е подготвен да биде домаќин на разговорите меѓу Соединетите Американски Држави и Иран за решавање на конфликтот на Блискиот Исток, изјави денес премиерот Шехбаз Шариф.

Шариф во објава на социјалната мрежа X изјави дека Пакистан ги поддржува напорите насочени кон дијалог за прекин на конфликтот на Блискиот Исток, во интерес на мирот и стабилноста во регионот и пошироко.

Тој истакна дека Пакистан, со договор меѓу Вашингтон и Техеран, е подготвен и почестен да биде домаќин и да посредува во „значајни и конечни преговори“ што би довеле до сеопфатно решение за сегашниот конфликт.

Британски Гардијан, пак, денеска објави дека потпретседателот на Соединетите Американски Држави, Џеј Д. Венс, би можел да ја предводи американската страна во мировните преговори со Иран во Пакистан, доколку тие се случат, соопштија пакистански дипломатски извори.

Според дипломатски извори, Вашингтон и Техеран би можеле да се сретнат на разговори во Исламабад уште оваа недела, за да разговараат за завршување на војната што започна пред речиси еден месец.

Беше нагласено дека сè уште не е официјално потврдено дека Исламабад ќе биде местото на мировните преговори, за што засега не е формално договорено од ниту една страна, според весникот.

Се верува дека пратеникот на Трамп за Блискиот Исток, Стив Виткоф, се подготвува да патува во Исламабад, но нема потврда дека некој од иранската страна ќе го стори тоа.

Пакистански извори посочија дека доколку се одржат разговори, Венс се споменува како најверојатен главен преговарач на САД, наместо Виткоф или зетот на Трамп, Џаред Кушнер, кој ги водеше разговорите за нуклеарната програма на Техеран пред да избувне војната.

САД и Израел го нападнаа Иран на 28 февруари, во она што го нарекоа „превентивни напади“, по неуспехот на повеќе рунди преговори за нуклеарната програма на Иран.

Потоа Иран започна масовни одмазднички напади врз Израел и цели поврзани со САД низ регионот на Блискиот Исток.