Инфантино: Фудбалот е клучен во промовирањето на мирот, Мундијалот да се одржи според распоредот

Претседателот на Меѓународната фудбалска федерација (ФИФА), Џани Инфантино, изјави дека фудбалот има клучна улога во промовирањето на мирот и додаде дека претстојното Светско првенство ќе се одржи според распоредот, објави вечерва АП.

Инфантино повтори по состанокот на Одборот на директори на ФИФА дека барањето на Иран да ги игра своите три натпревари од Светското првенство во јуни во Мексико, наместо во САД како што беше планирано, нема да биде одобрено.

Иранските власти претходно објавија дека не е можно фудбалската репрезентација на земјата да дојде во САД поради заедничките воени напади што ги извршија Израел и САД од 28 февруари.

Според распоредот, фудбалската репрезентација на Иран треба да игра во Инглвуд, Калифорнија против Нов Зеланд на 15 јуни и против Белгија на 21 јуни, а треба да ја заврши групната фаза на 26 јуни во Сиетл со натпревар против Египет.

„Имаме распоред, сакаме Светското првенство да се одржи според планот“, рече Инфантино за распоредот на натпреварите објавен во декември.

ФИФА одлучи да не преземе никакви мерки по жалбата на Палестинската фудбалска асоцијација против Израел. Палестинските фудбалски претставници долго време тврдат дека Израел ги крши статутите на ФИФА со тоа што им дозволува на клубовите од доселеничките населби на Западниот Брег да играат во националната лига.

„ФИФА не треба да преземе никакви мерки, со оглед на тоа што во контекст на толкувањето на релевантните одредби од статутите на ФИФА, конечниот правен статус на Западниот Брег останува нерешено и многу сложено прашање според јавното меѓународно право“, се вели во соопштението на ФИФА.

„ФИФА не може да ги реши геополитичките конфликти, но ние сме посветени на користење на моќта на фудбалот и Светското првенство за градење мостови и промовирање мир, бидејќи мислиме на оние кои страдаат поради тековните војни“, рече Инфантино.