Неодамна објавеното сознание на воениот портал „Танго сикс“ дека српската армија има нова суперсонична квазибалистичка ракета ЦM-400 од кинеско производство, која има дострел од најмалку 250 километри, предизвика бројни реакции од официјален Загреб, а премиерот Андреј Пленковиќ вели дека ова е ново во арсеналот на српските вооружени сили и дека ќе го предупреди НАТО.

Пленковиќ го изјави ова вчера во Пожега, коментирајќи дали ова претставува опасност за соседните земји

„Што се однесува до можностите на хрватската армија, сите овие години инвестиравме многу во неа. Хрватска е членка на НАТО и ги следиме процесите што се случуваат во Србија. Во секој случај, не очекуваме дека поседувањето на толку сериозно оружје во кој било сценарио би можело да доведе до негова употреба против соседните земји, Хрватска или други“, рече Пленковиќ.

Сепак, тој најави дека Хрватска ќе разговара за оваа тема со своите сојузници.

„Ќе разговараме со нашите партнери во НАТО и ќе ги предупредиме за таквото оружје, кое е ново во арсеналот на српските вооружени сили“, нагласи тој.

Српскиот претседател Александар Вучиќ, пак, во четврток изјави дека Белград внимателно ја следи воената соработка меѓу Хрватска, Албанија и Косово, тврдејќи дека Србија се подготвува за потенцијален напад.

„Се подготвуваме за нивниот напад, тие формираа сојуз за да нè нападнат. Тие го чекаат моментот што ќе се случи во иднина кога ќе избувне голем конфликт меѓу Европа и Русија и на Блискиот Исток. Сè што правиме, го правиме за да се одбраниме“, рече Вучиќ во интервју за Радио Телевизија Србија (РТС).

Неговите забелешки се однесуваа на трилатералната декларација за одбранбена соработка потпишана од Хрватска, Албанија и Косово во Тирана на 18 март 2025 година, со цел зајакнување на безбедносната соработка и воената интероперабилност.

Вучиќ потврди дека Србија поседува кинески хиперсонични ракети, за кои рече дека биле случајно снимени па за нив дознала јавноста.

„Тоа се ракети воздух-земја. Им честитам на нашите инженери, тие успешно интегрираа кинеска ракета во руски борбен авион МиГ-29, а ова се најдобро опремените МиГ-ови во Европа и во светот. Ова значи дека погодувате цели на земја со ракети со разорна моќ, на оддалеченост до 200 и до 400 км. Имаме значителен број ракети и ќе имаме уште повеќе. Тие се покажаа како најдобри во индиско-пакистанската војна и го уништија радарскиот систем С-400“, рече српскиот претседател.

Вучиќ, исто така, рече дека Србија одржува добри односи со НАТО, додека продолжува да води политика на воена неутралност.