Европската комесарка за проширување Марта Кос на министерскиот состанок на Берлинскиот процес порача дека Црна Гора е во завршна фаза од преговорите со Европската Унија и дека на следната меѓувладина конференција, на средината на октомври, се очекува затворање на уште неколку преговарачки поглавја.
„Веќе затворивте 18 преговарачки поглавја, а очекуваме уште неколку поглавја да бидат затворени на следната меѓувладина конференција на средината на октомври. Сега цврсто сте во завршната фаза, затоа продолжете да ја вложувате целата енергија за успешно завршување на преговорите“, рече Кос во Будва.
„Тоа е ваше достигнување овде во Црна Гора. Создадовте нов поттик за проширувањето на целиот Западен Балкан.“
Говорејќи за политиката на проширување, таа наведе дека геополитичките причини и принципот заснован врз заслуги не се во спротивност.
„Геополитиката определува зошто проширувањето е важно и колку итно мора да дејствуваме, а ние остануваме посветени на принципот заснован врз заслуги бидејќи токму заслугите ги определуваат условите, кој е подготвен да се приклучи и кога“, рече Кос.
Таа истакна дека 2026 година веќе е рекордна година кога станува збор за отворањето и затворањето на преговарачките поглавја.
„Девет месеци од почетокот на годината веќе отворивме или затворивме повеќе поглавја отколку во која било претходна година во последните 25 години“, рече европската комесарка, додавајќи дека проширувањето не е само политичко прашање, туку и прашање на безбедноста, економскиот развој и отпорноста на европските демократии.
Домаќинот на состанокот, црногорскиот министер за надворешни работи Ервин Ибрахимовиќ, рече дека Црна Гора мора да работи на реформите.
„Сè уште мора да работиме на реформите, но, исто така, важно е да ги намалиме политичките тензии. Пред нас има уште работа во рамките на европските интеграции, а процесот на трансформација мора да го подготвиме сами“, рече Ибрахимовиќ.
Министерскиот состанок на Берлинскиот процес, кој ги собира шефовите на дипломатиите на земјите од Западен Балкан, високите претставници на земјите членки на Берлинскиот процес, Европската Унија и регионалните организации, денес започна во Будва, Црна Гора.
Домаќин на состанокот е црногорскиот министер за надворешни работи Ервин Ибрахимовиќ, а на почетокот се обрати и европската комесарка за проширување Марта Кос.
Црна Гора во 2026 година првпат претседава со Берлинскиот процес, започнат во 2014 година. Претседавањето ќе заврши со самитот на лидерите, најавен за 22 октомври.
Берлинскиот процес ги обединува владите на земјите од Западен Балкан, девет земји членки на ЕУ и Велика Британија, со силна поддршка од регионалните организации, како и од Германија како иницијатор на оваа иницијатива и претставува платформа за зајакнување на регионалната соработка и приближување на земјите од Западен Балкан кон ЕУ.
Цел на Берлинскиот процес е подобрување на регионалната соработка, како и соработката со ЕУ во низа области на политиките, со цел да се поддржат земјите од регионот во постигнувањето на стандардите на ЕУ и да се обезбедат конкретни придобивки за граѓаните.
