Во Сараево денес започна вториот меѓународен саем за туризам „Туризам Експо Сараево 2026“, кој до 24 октомври во салата „Мирза Делибашиќ“ во „Скендерија“ ќе собере повеќе од 200 претставници од туристичкиот сектор од осум земји на 96 изложбени позиции, со деловни средби, едукативни работилници и културна програма.

Саемот претставува можност за поврзување на туристичките дестинации, институциите, туристичките агенции, хотелите и другите даватели на услуги, размена на искуства и воспоставување нови деловни соработки.

На саемот учествуваат излагачи од Босна и Херцеговина, Северна Македонија, Хрватска, Србија, Црна Гора, Чешка, Словачка и Индонезија, а градот Улцињ и оваа година има улога на партнер-град.

На посетителите ќе им се претстават туристички организации, хотели, агенции, музеи, скијачки центри и компании што нудат опрема и услуги за секторот ХОРЕКА (хотели, ресторани и угостителство), со програма што ги поврзува туристичката индустрија, културата, едукацијата и промоцијата на дестинациите.

Во текот на три дена на саемот ќе се разгледуваат теми што се значајни за натамошниот развој на туризмот, вклучително и предизвиците поврзани со работната сила, брендирањето на дестинациите, луксузните патувања, развојот на тематски туристички маршрути, одржливиот и велнес-туризмот, како и дигиталните иновации. Програмата вклучува и претставување искуства и добри практики од Јапонија.

Посебен сегмент на саемот е „Туризам Експо Лаб“, кој во сабота, 24 октомври, ќе понуди бесплатни практични работилници наменети за туристичките работници, претприемачите, туристичките водичи и студентите.

Темите на работилниците ќе опфатат развој на туристички производи, културно наследство, дигитален маркетинг и примена на вештачката интелигенција во туризмот.

Културната програма дополнително ќе ја збогати проекцијата на туристичкиот филм на Роберт Дацешин „Травник – срцето на БиХ“, програмата „Севдах низ времето“ во изведба на фондацијата „Севдах“, како и проектот „Старите занаети – живи ателјеа на Сараево“, посветен на промоцијата на традиционалните занаети како дел од автентичната туристичка понуда.

Посетителите ќе може да искористат и посебни саемски поволности. Туристичките агенции ќе претстават атрактивни аранжмани по специјални саемски цени, а организаторот подготвил и 50 наградни патувања, со што се нуди дополнителна можност за запознавање нови дестинации и планирање на следните патувања.

Организатор на саемот е агенцијата „ПРОФИ ТИМ“, во коорганизација со Здружението за поттикнување на културата, туризмот, уметноста и спортот „СПИРИТУС“ и Здружението „СПОРТКУЛТ“.