Генералниот секретар на Обединетите нации, Антонио Гутереш, денеска повика на итно и драстично намалување на емисиите на стакленички гасови, предупредувајќи дека привременото надминување на прагот од 1,5 степени Целзиусови за глобално затоплување сега е неизбежно.

Зборувајќи на прес-конференција на маргините на самитот за климата КОП31 во Анталија, Гутереш рече дека глобалните емисии мора да се намалат за околу шест проценти годишно во следните неколку години за да се ограничи обемот и времетраењето на надминувањето.

„Надминувањето на прагот од 1,5 степени сега е неизбежно“, рече тој, нагласувајќи ја потребата надминувањето да се задржи „во најмала можна мера и за најкратко можно време“ и температурите да се вратат под тој праг што е можно поскоро.

Тој предупреди дека сегашните национални климатски обврски го водат светот кон затоплување од околу 2,5 проценти до крајот на векот, опишувајќи ја таквата траекторија како „рецепт за катастрофа“.

Гутереш повика на побрз, фер и правичен премин од фосилните горива, нагласувајќи дека проширувањето на обновливите извори на енергија мора да биде придружено со намалување на производството и потрошувачката на фосилни горива.

„Фосилните горива се причина за климатската криза. Не постои кредибилен пат до безбедна клима без напуштање на овие горива“, рече тој.

Тој ги повика развиените земји да ги исполнат своите обврски за финансирање на климатските промени и да го забрзаат намалувањето на емисиите, истовремено повикувајќи ги економиите во развој, вклучително и Кина, да го забрзаат преминот од фосилни горива кон обновливи извори на енергија.

Гутереш ја нагласи потребата од поголема поддршка за земјите во развој, особено најранливите, за да им се помогне да се прилагодат на климатските промени и да се справат со загубите и штетите.