Либанскиот премиер Наваф Салам денес изјави дека воените активности на Хезболах се „нелегални“ и потврди дека владата побарала либанската, проиранска милитантна група да го положи оружјето.

Салам рече дека апсолутно ги отфрла сите воени акции започнати од либанска територија надвор од рамките на државните институции, објави Ал Џезира.

„Ги забрануваме воените активности на Хезболах, ја ограничуваме неговата улога на политичката сфера и бараме нашите воени институции да ја спроведат“, рече Салам.

Тој ја потврди посветеноста на либанската влада на продолжување на преговорите со Израел и на прекинот на огнот постигнат во 2024 година.

Изјавата доаѓа по серијата воздушни напади на израелската армија во Либан, „како одговор на ракетниот оган на Хезболах кон северен Израел“.

Најмалку 31 лице загинало, а 149 други се повредени во понеделник наутро во израелските напади насочени кон јужните предградија на Бејрут и јужен Либан, соопшти либанското Министерство за здравство.

Хезболах во неделата изјави дека има „должност“ да го поддржи Иран по израелските и американските напади, според АФП.

Хезболах е ослабен од конфликтот со Израел, по нападот на Хамас врз Израел во октомври 2023 година и последователниот израелски геноцид во Газа.

Израел и Хезболах потпишаа договор за прекин на огнот во ноември 2024 година, иако Израел продолжи да напаѓа цели во Либан.

Хезболах не интервенираше за време на 12-дневната војна меѓу Израел и Иран минатиот јуни.