НАТО соопшти дека пресретнал уште една балистичка ракета упатена кон Туркије, потврдувајќи ја подготвеноста на Алијансата да ги брани сите свои членки од каква било закана, објави денеска на Х портпаролката Алисон Хард.

Претходно турското Министерство за одбрана објави дека балистичка ракета испукана од Иран влегла во турскиот воздушен простор пред да биде пресретната од силите на НАТО.

Некои остатоци паднале на празно земјиште во југоисточната покраина Газиантеп, но немало жртви или повредени, додаде министерството.

Во посебна изјава на X, турскиот директор за комуникации Бурханетин Дуран потврди дека системите на НАТО ја вклучиле заканата „навремено“ над округот Сахинбеј во Газиантеп.

„Уште еднаш силно го повторуваме нашето предупредување до сите страни, особено Иран, да се воздржат од дејствија што би можеле да ја загрозат регионалната безбедност и да ги доведат цивилите во опасност“, рече тој.

Минатата среда, турското Министерство за одбрана соопшти дека балистичка муниција испукана од Иран кон турскиот воздушен простор била пресретната и неутрализирана од единиците за воздушна и ракетна одбрана на НАТО во Источниот Медитеран.

Овој развој на настаните се случи во време на тековните напади на САД и Израел врз Иран, започнати на 28 февруари, во кои загинаа повеќе од 1.200 луѓе, вклучувајќи го и врховниот лидер ајатолахот Али Хамнеи.

Техеран возврати со напади со беспилотни летала и ракети насочени кон Израел, Јордан, Ирак и земјите од Персискиот Залив, каде што се наоѓаат американски воени средства.