Речиси 6.000 станбени згради во Киев, што е половина од вкупниот број, останаа без греење денес по рускиот напад, поради оштетување на важни инфраструктурни објекти, објави градоначалникот на Киев, Виталиј Кличко.

Тој ги повика жителите на украинската престолнина привремено да го напуштат градот, доколку е можно, и да одат таму каде што има алтернативни извори на електрична енергија и греење.

„Половина од станбените згради во Киев, речиси 6.000, моментално се без греење поради оштетување на критичната инфраструктура на главниот град поради масовниот непријателски напад“, рече Кличко во објава на Телеграм, пренесува Укринформ.

Тој додаде дека комуналните работници ги снабдиле социјалните институции, вклучувајќи ги болниците и породилиштата, со мобилни котли и дека се работи на враќање на услугите за други потрошувачи.

„Правиме сè за да го направиме ова што е можно поскоро. Но комбинираниот напад врз Киев синоќа беше најболен за критичната инфраструктура на главниот град. Градските служби работат во вонреден режим. А прогнозите предвидуваат тешки временски услови во наредните денови“, рече градоначалникот.

Во текот на ноќта, руската армија го нападна Киев од различни насоки со беспилотни летала и ракети, вклучувајќи балистички ракети, при што беше предизвикана штета во неколку градски области, а во нападот беа убиени четири лица, а 25 беа повредени.