Европскиот парламент во четвртокот го поддржа предлогот на Европската комисија на европската автомобилска индустрија да ѝ се олесни исполнувањето на обврските за намалување на емисиите на ЦO2  до 2040 година.

Европскиот автомобилски сектор го доживува влијанието на брзите технолошки промени и зголемената конкуренција, а предложените промени треба да им го олеснат на производителите исполнувањето на своите обврски за намалување на емисиите на ЦO2.

Предлогот беше поддржан од европратениците на пленарната седница во Стразбур со 458 гласови „за“, 101 „против“ и 14 „воздржани“.

Предложената промена им нуди на производителите можност да ги исполнат своите обврски за годините 2025, 2026 и 2027 година со пресметување на просекот на нивните перформанси во период од три години, наместо за секоја поединечна година. 

Овој пристап би им овозможил да ги компензираат сите вишок годишни емисии со надминување на целта во следните години, објави Европскиот парламент.

Сегашните правила поставуваат годишни цели, кои опфаќаат петгодишни периоди, за намалување на просечните емисии на ЦO2 од новите автомобили и комбиња во возниот парк на ЕУ. 

Од 2025 година, за периодот 2025-2029 година ќе се применува годишна цел за намалување на емисиите на ЦO2 од 15% во споредба со вредностите од 2021 година.

Со цел да се забрза усвојувањето, Парламентот во вторник се согласи да го разгледа прашањето по итна постапка. За да стапи во сила, нацрт-законот сега бара формално одобрување од Советот, кој го одобри истиот текст на 7 мај 2025 година.

Предлогот е дел од Индустрискиот акционен план на Комисијата за европскиот автомобилски сектор, објавен на 5 март 2025 година. 

Тој следи по стратешкиот дијалог за иднината на автомобилската индустрија што го започна претседателката на Комисијата, Урсула фон дер Лајен, на 30 јануари 2025 година, кој вклучуваше отворени јавни консултации и дискусии со индустријата и засегнатите страни за решавање на најитните предизвици со кои се соочува секторот, според ЕП.

– 2025 до 2029 година- автомобили: 93,6 г ЦO2/км, комбиња: 153,9 г ЦO2/км

– 2030 до 2034 година- автомобили: 49,5 г ЦO2/км, комбиња: 90,6г ЦO2/км

– од 2035 година, целта за емисии на CO2 за целиот возен парк на ЕУ за автомобили и комбиња е 0 г ЦO2/км, што одговара на намалување од 100%.

Сосема е јасно дека овие бројки е невозможно да се постигнат без потребниот „процент“ на електрични автомобили, што многу класични брендови ниту го сакаат, ниту можат да го постигнат. 

Проблемот е уште поголем бидејќи галопирачката кинеска конкуренција развива електрични автомобили повеќе од 20 години, додека повеќето класични производители имаат само неколку години искуство и далеку заостануваат зад Кинезите во однос на технологијата и цената. 

За да биде уште полошо, нема решение на повидок за тоа како да се конкурира со кинеската автомобилска индустрија, која се заканува да го преземе автомобилскиот пазар во следните 10 години.