САД означи четири групи во Европа како терористички

Соединетите Американски Држави во четврток означија четири групи во Германија, Италија и Грција како глобални терористи, обвинувајќи ги дека се „насилна антифа“, додека претседателот Доналд Трамп ги таргетира левичарските групи.

Државниот секретар на САД, Марко Рубио изјави дека ги означиле членовите на германската група Антифа Ост како „специјално означени глобални терористи“, заедно со членовите на три други групи во Грција и Италија, продолжувајќи ја политиката на Трамп за „конфронтација со кампањата на политичко насилство на Антифа“.

Рубио рече дека има намера да ги означи групите како „странски терористички организации“ почнувајќи од 20 ноември и предупреди дека Вашингтон ќе таргетира и други групи низ целиот свет.

„Групите поврзани со движењето се водени од револуционерни анархистички или марксистички идеологии, вклучувајќи антиамериканизам, антикапитализам и антихристијанство, користејќи ги за поттикнување и оправдување на насилни напади дома и во странство“, рече Рубио.

Тој додаде дека Соединетите Американски Држави ќе продолжат да ги користат сите достапни алатки за заштита на националната и јавната безбедност и да им ги одземат финансирањето и ресурсите на терористите, што ќе вклучува таргетирање на други антифа групи низ целиот свет.

Трамп и неговите републикански сојузници ги обвинија следбениците на Антифа за поттикнување политичко насилство по атентатот врз конзервативниот активист Чарли Кирк во септември и протестите против Службата за имиграција и царина (ИЦЕ) во Лос Анџелес, Чикаго и Портланд.

Трамп се закани дека ќе ги прогонува Антифа за време на неговиот прв мандат, а во септември ја прогласи групата за терористичка организација со извршна наредба.

Некои правни експерти за национална безбедност рекоа дека означувањето е правно сомнително бидејќи Антифа нема официјално раководство или организациска структура.