Американскиот републикански конгресмен Ренди Фајн во понеделникот претстави закон со кој се бара овластување за анексијата на Гренланд и неговото евентуално приклучување кон Соединетите Американски Држави.

Фајн го објави предлогот на социјалната мрежа X, велејќи дека неговиот закон, наречен „Закон за анексијата и државноста на Гренланд“, ќе му овозможи на претседателот Доналд Трамп да ги пронајде потребните средства за анексијата на Гренланд.

„Акцијата за Гренланд би ги спречила нашите противници да го контролираат арктичкиот регион и да го обезбедат нашето северно крило од Русија и Кина“, рече сопартиецот на Трамп.

Законот го овластува претседателот да преговара со Данска за анексијата или поинакво стекнување на Гренланд како територија на САД.

Исто така, законот бара од администрацијата да достави извештај до Конгресот во кој ќе бидат наведени промените во федералниот закон потребни за забрзување на пристапувањето на Гренланд кон Соединетите Американски Држави.

Трамп во неделата изјави дека Соединетите Американски Држави мора да го стекнат Гренланд за да спречат преземање од страна на Русија или Кина.

„Зборуваме за аквизиција, а не за закуп, не за краткорочно поседување. Зборуваме за аквизиција. Ако не го направиме ние тоа, ќе го сторат Русија или Кина, а тоа нема да се случи додека сум претседател“, им рече Трамп на новинарите.

Гренланд, самоуправна територија во рамките на Кралството Данска, привлече интерес на САД поради својата стратешка локација и огромните минерални ресурси.

Трамп претходно ја опиша сопственоста на Гренланд како апсолутна неопходност за економската безбедност на САД, споредувајќи ја со голем договор за недвижности.

И Данска и Гренланд ги отфрлија сите предлози за продажба на територијата, потврдувајќи го данскиот суверенитет над островот.

Според извештаите на медиумите, се очекува американскиот државен секретар Марко Рубио да се сретне со дански и гренландски претставници оваа недела.