Државниот секретар на Соединетите Американски Држави, Марко Рубио, денес изјави дека во моментов има мали шанси за постигнување мировен договор меѓу Соединетите Американски Држави и Куба, нагласувајќи дека Вашингтон сè уште претпочита дипломатско решение во односите со Хавана, но дека не очекува значителен напредок во разговорите со сегашното кубанско раководство.

„Тоа останува наш приоритет кога станува збор за Куба. Но искрено кажано, со оглед на тоа со кого моментално си имаме работа, веројатноста тоа да се случи не е голема. Ако го променат својот став, ние сме подготвени да разговараме. Во меѓувреме, ќе продолжиме да правиме она што го сметаме за потребно“, изјави Рубио пред новинарите пред да замине на состанок на министрите за надворешни работи на НАТО во Шведска.

Рубио оцени дека Куба „долго време е закана за националната безбедност на САД“, тврдејќи дека на островот се наоѓаат руски и кинески разузнавачки структури.

„Куба обезбедува простор за присуство на руски и кинески разузнавачки служби“, рече Рубио.

Тој додаде дека администрацијата на американскиот претседател Доналд Трамп продолжува со политиката на притисок со цел промена на режимот на Куба, но и дека Хавана ја прифатила понудата на САД во форма на хуманитарна помош вредна 100 милиони долари.

Група американски сенатори од редовите на Демократската партија вчера поднесоа резолуција со која бараат американскиот претседател Доналд Трамп да биде спречен да ја користи војската против Куба.

Резолуцијата на демократските сенатори е поднесена во време кога администрацијата на Трамп го зголемува притисокот врз кубанската влада со обвинение против поранешниот претседател Раул Кастро, заради соборувањето на американски авиони пилотирани од кубански бегалци во 1996 година.