Зеленски: Имавме добри разговори со престолонаследникот бин Салман

Украинскиот претседател Владимир Зеленски изјави дека имал добри разговори со саудискиот престолонаследник Мохамед бин Салман за регионални и меѓународни прашања.

„Благодарен сум за неговата мудра перспектива за меѓународната ситуација и неговата поддршка за Украина. Беше многу важно да се слушне неговата доверба во иднината на Украина“, рече Зеленски на Телеграм.

Тој рече дека разговарале за „сите клучни прашања на агендата, и билатерално и со другите партнери“, пофалувајќи ја улогата на принцот во „доближувањето на вистинскиот мир“.

„Саудиска Арабија обезбедува клучна платформа за дипломатијата и ние тоа го цениме“, додаде тој.

Зеленски истакна дека украинската делегација останува во Џеда да работи со нивните американски колеги во вторник, изразувајќи „надеж за практичен резултат“ за тековниот конфликт Москва-Киев.

Тој вети дека позицијата на Украина во разговорите „ќе биде апсолутно конструктивна“.

„Детално разговаравме со Мухамед бин Салман за чекорите и условите потребни за да се стави крај на војната и да се обезбеди траен мир. Тој ја истакна важноста на ослободувањето на затворениците и враќањето на децата, што може да послужи како клучни мерки за градење доверба во дипломатските напори. Значаен дел од нашиот разговор се фокусираше на безбедносните гаранции“, рече Зеленски.

Тој, исто така, ја истакна „подготвеноста на Саудиска Арабија да ја прошири економската соработка и да инвестира во Украина“.

„Разговаравме за клучните инвестициски сектори, вклучително и безбедноста, енергијата и инфраструктурата. Гледаме заеднички можности за економски развој и соработка, особено во реконструкцијата на Украина“, истакна тој.

Американскиот државен секретар Марко Рубио и советникот за национална безбедност Мајк Валц во вторник ќе се сретнат со високи украински претставници предводени од Андриј Јермак, главен помошник на Зеленски, во Саудиска Арабија.