Вршителот на должноста премиер на Косово, Албин Курти, објави дека оваа недела ќе започне разговори за формирање на нова косовска Влада, позната како „Курти 3“, јавува Анадолу.
На прес-конференција, Курти рече дека 26 октомври е крајниот рок за одржување седница на Парламентот на која ќе го претстави новиот владин кабинет.
„Многу наскоро, веќе оваа недела, ќе започнеме комуникација и дискусии за формирање Влада, бидејќи на Косово му е потребен нов мандат за нашата Влада. Потребен ни е мандат што ги одразува резултатите од изборите од 9 февруари 2025 година. Исто така, како премиер во техничкиот мандат, веќе влегов во седмиот месец од петтата година од четиригодишниот мандат и време е за нов, целосен мандат. Тој мандат сигурно ќе започне штом ќе го претставиме новиот состав на Владата 'Курти 3' во парламентарна процедура“, рече тој.
На новинарско прашање дали, со оглед на резултатите од локалните избори, се подготвени за нови парламентарни избори, Курти одговори дека приоритет е продолжување на Владата, но дека во отсуство на договор, тие се подготвени и за нови избори.
„Се подготвуваме за Владата 'Курти 3'. Ако не се случи тоа, несомнено сме подготвени за нови парламентарни избори. Движењето 'Самоопределување', во годината кога ја слави својата 20-годишнина, останува пример и лекција за тоа како луѓето се организираат околу политичките принципи и националните идеали за доброто на сите граѓани без разлика. Нашата подготвеност е целосна, но првиот план останува формирањето нова влада, и тоа е она на што моментално се фокусираме, и верувам дека и другите треба да се подготват за тоа“, додаде Курти.
Претседателката на Косово, Вјоса Османи, на 11 октомври потпиша декрет со кој на лидерот на Движењето „Самоопределување“, Албин Курти, му се дава мандат да формира нова Влада на Косово.
Оваа одлука следуваше по официјалниот предлог на Движењето „Самоопределување“, кое со освоени 48 места стана најсилната политичка сила во Собранието според резултатите од парламентарните избори одржани на 9 февруари годинава.
Според Уставот на Косово, кандидатот за премиер е должен да му предложи на Собранието, најдоцна 15 дена од датумот на донесувањето на декретот, состав и програма на новата Влада за усвојување.
