На Европската Унија (ЕУ) ѝ е потребен НАТО за справување со безбедносните закани на нејзиното источно крило, но Европа мора да се подготви да преземе поголема одговорност за сопствената одбрана бидејќи САД ги пренасочуваат ресурсите кон Индопацификот, изјави денес европскиот комесар за одбрана и вселена Андриус Кубилиус.
„Многу е јасно зошто ни е потребен НАТО бидејќи имаме многу јасни закани на нашата источна граница: Русија и Белорусија“, рече Кубилиус на конференцијата организирана од тинк-тенк организацијата „Пријатели на Европа“ во Брисел.
Тој предупреди дека не треба да се претпоставува оти САД неограничено ќе го задржат сегашното ниво на воено присуство во Европа.
Кубилиус рече дека стратегискиот фокус на Вашингтон сè повеќе се обликува од растечката моќ на Кина и случувањата во Индопацификот, што, според него, ќе бара од САД да пренасочат дел од ресурсите од Европа.
„Затоа од нас бараат да ги развиеме нашите капацитети и да бидеме подготвени да преземеме примарна одговорност на европскиот континент, додека тие ќе ја задржат секундарната одговорност“, рече тој.
„Моето разбирање е дека навистина ќе гледаме многу помалку Американци овде, на европскиот континент. Не затоа што повеќе не нè сакаат, туку затоа што треба да се пренасочат кон Индопацификот“, рече тој.
Кубилиус истакна дека затоа ЕУ треба да ги зајакне своите одбранбени капацитети и материјално и институционално.
„Нашите доктрини, вклучително и надворешната политика и одбраната, нашите институции и нашето одлучување, кои беа создадени во тоа време, повеќе не одговараат на денешната ситуација“, рече тој.
Тој рече дека на Европа ѝ се потребни посилни механизми за колективно одлучување, паралелно со зголемување на воените капацитети.
Според Кубилиус, идната Европска одбранбена унија треба да ги обедини земјите од целиот континент и да ги вклучи Украина и Канада.
Кубилиус, исто така, предложи да се разгледа помал формат на одлучување, потенцијално според моделот на концептот Е5 плус (Европската група пет), со можност ротирачко учество на помалите земји.
