Премиерот Христијан Мицкоски утрово информираше дека во Њујорк разговарал со државниот секретар на Соединетите Американски Држави, Марко Рубио.

„Овие разговори имаат особено значење и претставуваат потврда на важноста на стратешкото партнерство и континуираниот политички дијалог со Соединетите Американски Држави. Директната комуникација на високо политичко ниво е важна можност за размена на ставови за прашањата од заеднички интерес, за продлабочување на билатералните односи и за натамошно зајакнување на нашата позиција како стабилен и доверлив сојузник“, истакна Мицкоски.

Во период на сериозни геополитички предизвици, премиерот оцени дека силните партнерства и отворениот дијалог со нашите стратешки сојузници имаат уште поголема тежина.

„Македонија има јасни државни интереси и продолжува достоинствено и принципиелно да ги застапува заедно со нашите стратешки партнери. Продолжуваме да го јакнеме македонско-американското стратешко партнерство и да создаваме нови можности“, порача тој.

Државната делегација предводена од премиерот Мицкоски престојуваше во Вашингтон на средби со американските власти, а сега е во Њујорк за годишното заседание на Обединетите Нации.