Американскиот претседател Доналд Трамп упати барање до европските сојузници во рок од само неколку дена да пратат воени бродови или други воени средства за да помогнат во обезбедувањето на Хормускиот Проток, објави „Дер Шпигел“.

Ова се случи за време на состанокот зад затворени врати во Белата куќа меѓу Трамп и генералниот секретар на НАТО, Марк Руте.

Потоа Руте им кажа на европските престолнини дека Вашингтон бара „конкретни обврски“ во наредните денови, објави весникот, цитирајќи европски дипломати што зборуваа под услов на анонимност.

Дипломатите го карактеризираа барањето како „ултиматум“, велејќи дека администрацијата на Трамп јасно ставила до знаење дека нејасните „политички ветувања“ од сојузниците веќе не се доволни.

Остана нејасно дали САД инсистираат на формална мисија на НАТО или едноставно на координирани национални распоредувања на сили.

Главните европски сојузници, вклучително и Германија, досега беа воздржани во праќањето поморски сили за да се осигури слободната пловидба низ Ормускиот Теснец, велејќи дека САД и Израел не се консултирале со нив пред започнувањето на војната против Иран.

Германскиот канцелар Фридрих Мерц претходно ги критикуваше САД и Израел за недостиг на јасна стратегија за прекин на конфликтот.

Тој рече дека Германија би можела да помогне во обезбедувањето на пловидбата во теснецот дури по прекин на огнот и тоа само со меѓународен мандат и одобрение од германскиот Парламент.

Трамп по состанокот со Руте вчера продолжи со своите критики кон европските сојузници и нивната улога за време на конфликтот.

„НАТО не беше таму кога ни беше потребен и нема да биде таму ако ни затреба повторно“, напиша тој.

Претходно портпаролката на Белата куќа, Каролин Левит, за новинарите изјави дека Трамп верува оти НАТО бил „тестиран и паднал на испитот“ за време на војната во Иран.

„Мошне е тажно што НАТО му сврти грб на американскиот народ во текот на последните шест недели, кога токму американскиот народ е тој што ја финансира нивната одбрана“, рече таа.