Осмиот Дигитален самит на Западен Балкан вчера официјално беше отворен во Херцег Нови, обединувајќи владини претставници од шесте економии на Западен Балкан, институции на Европската Унија (ЕУ), меѓународни организации, телекомуникациски оператори и експерти од дигиталната индустрија, со цел унапредување на регионалната дигитална трансформација, зајакнување на поврзаноста и забрзување на интеграцијата со Единствениот дигитален пазар на ЕУ.
Самитот го организира Министерството за јавна администрација на Црна Гора, под покровителство на Владата на Црна Гора, во партнерство со Советот за регионална соработка (РСС) и Европската Унија, а во соработка со различни регионални и меѓународни организации и други партнери.
Самитот официјално го отвори министерот за јавна администрација на Црна Гора, Мараш Дукај, а обраќајќи им се на учесниците, генералниот секретар на RCC, Амер Капетановиќ, истакна дека дигиталната трансформација на регионот мора да оди подалеку од развивањето поединечни системи и да се насочи кон нивно заедничко функционирање, објави МИА.
„Нашиот следен предизвик не е едноставно да дигитализираме шест економии. Предизвикот е да ги поврземе“, рече Капетановиќ.
Посочувајќи го укинувањето на трошоците за роаминг во рамките на Западен Балкан како едно од најопипливите достигнувања на регионалната соработка, Капетановиќ нагласи дека истиот пристап сега треба да го води напредокот во дигиталните јавни услуги, интероперабилните дигитални идентитети, телекомуникациската инфраструктура, вештачката интелигенција и кибербезбедноста.
Тој подвлече дека дигиталната соработка е суштински дел од Заедничкиот регионален пазар и од подготовките на регионот за поблиска интеграција со Единствениот пазар на ЕУ, нагласувајќи ја потребата политичките заложби да се преточат во конкретни придобивки за граѓаните и бизнисите.
„Да си заминеме од Херцег Нови со појасно чувство на одговорност за она што следува: што ќе испорача секој од нас, со кого и до кога“, заклучи Капетановиќ.
Во своето главно министерско обраќање, Дукај ја истакна важноста на регионалната соработка во градењето модерни, безбедни и достапни дигитални јавни услуги.
„Дигиталната трансформација не значи само воведување нови технологии. Таа значи промена на начинот на кој функционираат нашите институции и обезбедување поедноставни, побрзи и подостапни јавни услуги за граѓаните и бизнисите. Организирањето на овој Самит за време на претседавањето на Црна Гора со Берлинскиот процес претставува можност да ја зајакнеме соработката низ Западен Балкан, да размениме конкретни решенија и да го забрзаме нашиот заеднички напредок кон европските дигитални стандарди“, рече Дукај.
Во преостанатиот дел од Самитот учесниците ќе учествуваат во серија тематски дискусии посветени на дигиталниот идентитет и дигиталните паричници, кибербезбедноста, вештачката интелигенција, дигиталните вештини и иднината на работата, како и дигитализацијата на локалната самоуправа и јавните услуги.
Програмата ќе ги опфати и дигиталната поврзаност, алатките за вештачка интелигенција на Европската комисија што го поддржуваат процесот на пристапување кон ЕУ, заштитата на децата на интернет, како и можностите за стартап-компаниите и иновациите. Посебните билатерални и деловни средби (B2B) ќе обезбедат дополнителни можности за партнерства и конкретна соработка меѓу регионалните и европските чинители.
Надоврзувајќи се на достигнувањата од претходните изданија, Осмиот Дигитален самит на Западен Балкан има за цел да ја зајакне заедничката регионална дигитална агенда, да ја подобри интероперабилноста на дигиталните услуги и да го забрза приближувањето на Западен Балкан кон Европската унија.
