Индискиот премиер Нарендра Моди соопшти дека Индија и Европската Унија (ЕУ) постигнале договор за слободна трговија (ФТА), по завршувањето на долгогодишните преговори.

„Постигнат е значаен договор меѓу Индија и Европа“, изјави Моди во виртуелното обраќање на Индиската енергетска недела, осврнувајќи се на финализирањето на преговорите за договорот.

Изјавата доаѓа во пресрет на разговорите на Моди со претседателката на Европската комисија, Урсула фон дер Лајен, и претседателот на Европскиот совет, Антонио Коста, кои престојуваат во главниот град Њу Делхи.

Моди истакна дека договорот ќе опфати околу 25 проценти од глобалниот бруто-домашен производ и една третина од светската трговија.

„Луѓето низ светот го нарекуваат ‘мајка на сите договори’“, рече тој.

„Ова е одличен пример за координација меѓу две од најголемите економии во светот“, додаде Моди.

Во меѓувреме, индискиот секретар за трговија, Раџеш Агравал, вчера соопшти дека Индија и ЕУ ги завршиле преговорите и дека договорот е финализиран.

Според него, договорот се очекува да биде потпишан подоцна оваа година, а да стапи во сила на почетокот на следната.

Според податоците на индиската Влада, Европската Унија останува најголем трговски партнер на Индија во размената на стоки, при што билатералната трговија достигнала околу 136 милијарди долари во фискалната 2024/2025 година.