Американскиот претседател Доналд Трамп и израелскиот премиер Бенјамин Нетанјаху во текот на ноќта одржале „долг и драматичен“ телефонски разговор, што е нивни втор контакт за само неколку дена, објави денес израелскиот „Канал 12“.

Не беа соопштени детали за содржината на разговорите, но Каналот ги опиша разговорите како „долги и драматични“.

Каналот објави дека повикот дошол во моментот кога двајцата лидери се чини дека се „на прагот на одлука“ во врска со војната со Иран.

Ниту Белата куќа, ниту Кабинетот на Нетанјаху не издадоа соопштение за разговорот.

Во неделата, Нетанјаху и Трамп разговарале во повик кој траел повеќе од 30 минути и бил фокусиран на „можноста за обновување на борбите во Иран“, јавуваат израелските медиуми.

По тој повик, Трамп го предупреди Иран на својот профил на платформата Вистина дека за Иран „часовникот отчукува“.

Трамп во понеделникот вечерта објави дека го одложил нападот планиран за вторник против Иран, на барање на Саудиска Арабија, Катар и Обединетите Арапски Емирати.

Тој додаде во објавата дека му наложил на Министерството за одбрана „да биде подготвено да продолжи со целосен напад од големи размери врз Иран, во секој момент, во случај да не се постигне прифатлив договор“.

По блокираните преговори со посредство на Пакистан, САД воведоа блокада на иранските пристаништа од 13 април, вклучувајќи ги и оние лоцирани покрај стратегискиот Ормуски Теснец.

Иран одговори со затворање на теснецот и со барање бродовите да го координираат пловењето со Техеран, во пресрет на стравувањата дека кревкиот прекин на огнот што е на сила од 8 април би можело да пропадне доколку не се постигне договор за прекин на војната што започна во февруари.