Демонстранти со молотови коктели ја гаѓаа зградата на Владата на Албанија

Инциденти и судир на полицијата и демонстрантите го одбележаа вечерашниот антивладиниот протест во Тирана, последниот во серијата протести, кој го свика најголемата опозициска партија, Демократската партија (ДП).

Илјадници поддржувачи на опозицијата од различни градови во земјата се собраа пред седиштето на Владата на Албанија на булеварот „Дешморет е Комбит“ во Тирана.

Според организаторите, протестот се одржа со барање за оставка од премиерот Еди Рама и вицепремиерката и министерка за инфраструктура и енергетика Белинда Балуку поради, како што наведува ДП, случаи на корупција.

Демонстрантите изјавија дека Балуку е обвинета за кривично дело кршење на рамноправноста на учесниците во тендери или јавни аукции. Специјалното обвинителство за борба против корупцијата и организираниот криминал (СПАК) побара од Собранието на Албанија да ѝ го одземе имунитетот на Балукu, која е и пратеник во парламентот, со цел нејзино апсење.

Претседателот на Демократската партија, Сали Бериша, во своето обраќање на протестот, изјави дека опозицијата исполнила неколку големи обврски што ги имала кон граѓаните.

„ДП останува решена да соработува со секој фактор, со секој граѓанин и со секоја политичка сила на најширокиот фронт што Албанија некогаш го видела. Имајте доверба дека, исто како што ја спасивме опозицијата кога сакаа да ја уништат, ќе ја спасиме и Албанија, ќе ги спасиме Албанците и ќе им го дадеме местото што го заслужуваат“, рече Бериша.

Бериша, исто така, ги повика сите опозициски политички сили и секој член на опозицијата да се обединат во борбата.

По говорот на Бериша, имаше тензии и судири меѓу демонстрантите и полициските сили, откако беа фрлени молотови коктели кон зградата на владата.

Накратко избувна пожар и во надворешниот дел од зградата на владата, а неколку лица беа повредени.

Демократската партија и другите опозициски партии најавија продолжување на протестите во наредните недели.