Полицијата во Палма де Мајорка вчера пукаше со гумени куршуми кон учесниците на протестите против масовниот туризам на тој шпански остров, кои се судрија со полицајците при што седум лица биле повредени, од кои двајца потешко.

Според проценките, околу 25.000 демонстранти учествуваа во протестот, а конфликтот се случи кога полицијата постави бариери за да ја пренасочи планираната рута на протестниот марш, која учесниците на протестот ја прескокнале.

Откако полицајците удриле неколку демонстранти со палки, некои демонстранти фрлиле шишиња кон полицајците, кои одговориле со испукување гумени куршуми.

Демонстрантите извикуваа дека Палма де Мајорка „ги достигна своите граници“ и се заканија дека ќе го затворат туристичкото место.

Некои од демонстрантите носеа транспаренти на кои пишуваше „Спасете ја Мајорка“, „Туристи, одете си дома“, „Туризам = уништување“ и „Помалку туризам, повеќе живот“.

Демонстрантите побараа крај на масовниот туризам на островот, велејќи дека туристите го намалиле квалитетот на животот на жителите на Мајорка.

Организаторите им рекоа на новинарите дека сакаат да ги презентираат своите ставови, особено пред да се одржат регионалните избори на Балеарските Острови за една година.

Датумот на протестот е намерно избран за да се совпадне со врвот на летната сезона. Крајот на јули и почетокот на август се сметаат за недели со најголем број туристи на тој остров од Балеарскиот архипелаг.

Нивното главно барање е ограничување на бројот на посетители. Растечкиот број туристи и сместувачки единици доведе до сериозен недостиг на домување. Организаторите на протестот се жалат дека многу луѓе со просечни приходи едвај можат да си дозволат стан на островот.

Ова е трето лето во кое има големи протести против туристите во Палма де Мајорка, а на претходните демонстрации туристите беа прскани со водни пиштоли.