Србија забрани извоз на нафта и горива

Српската влада на вонредна седница донесе одлука за привремена забрана на извозот на нафта и сите нафтени производи што се користат за напојување на моторите, со цел стабилизирање на домашниот енергетски пазар.

Според одлуката, забраната се однесува на извозот на дизел, бензин и сурова нафта по сите транспортни правци и ќе биде во сила до 19 март, по што ќе се разгледа евентуално продолжување или измена на мерките.

Српската министерка за рударство и енергетика Дубравка Ѓедовиќ Хандановиќ изјави дека целта на оваа одлука е да се спречат евентуални недостатоци и нагло зголемување на цените на горивата во Србија, во време кога глобалниот енергетски пазар поминува низ нестабилен период во сенка на ескалацијата на кризата на Блискиот Исток.

Таа истакна дека цените на нафтените производи во Србија во моментов се пониски од цените на меѓународните берзи, поради што државата, како што изјави, се обидува да ги заштити и граѓаните и економијата од дополнителни пазарни притисоци.

Владата соопшти дека внимателно ќе го следи развојот на ситуацијата на глобалниот пазар на енергија и соодветно ќе донесува идни одлуки.

Кризата на Блискиот Исток ескалираше од 28 февруари, кога Израел и САД започнаа со напади врз Иран во кои загинаа повеќе од 1.200 луѓе, вклучувајќи го и врховниот лидер Али Хамнеи и неколку безбедносни претставници.

Техеран одговори со лансирање ракети и беспилотни летала кон Израел и земјите од Персискиот Залив каде што се наоѓаат американските воени сили.

Овие конфликти директно го загрозуваат глобалниот пазар на енергија, првенствено поради прекинот на пловидбата низ Ормускиот теснец.