Деветтата вонредна седница на Српското народно собрание заврши во среда, а пратениците го отфрлија предлогот на опозицијата за недоверба на владата, потврдувајќи ја довербата во кабинетот на премиерот Ѓуро Мацут.

За предлогот за недоверба гласаа 40 пратеници, 135 беа против, додека еден беше воздржан, од вкупно 176 присутни.

Седницата беше свикана на барање на 109 пратеници од пратеничката група „Александар Вучиќ - Србија не смее да застане“, кои обезбедија кворум за нејзино одржување. На дневниот ред имаше само една точка – предлог за недоверба на владата, кој го поднесоа 62 пратеници од опозицијата на 13 февруари.

Тридневната седница започна на 27 јули, а овластениот предлагач, шефот на пратеничката група на Ново движење на Србија, Мирослав Алексиќ, помина речиси четири часа објаснувајќи го предлогот, наведувајќи дека предлогот за недоверба се однесува на целиот систем и повикувајќи го претседателот Александар Вучиќ да распише избори.

Опозицијата ги наведе сомнежите за вмешаност на одредени членови на владата во случајот со Генералштабот како причини за предлогот за недоверба, како и, како што тврдат, недостатокот на реакција од премиерот во оваа пригода.

Предлогот за гласање недоверба првпат беше на дневен ред на 15 април, кога седницата ја закажа претседателката на Парламентот, Ана Брнабиќ, но тогаш не се одржа поради недостаток на кворум.

Премиерот Ѓуро Мацут вечерва се обрати во српскиот Парламент на крајот од тридневната дебата и рече дека работата на владата нема да се оценува според зборови, туку според дела.

„Нашиот одговор кон граѓаните ќе биде уште повеќе работа, а не учество во конфликти“, рече Мацут.

Мацут истакна дека Владата останува посветена на работа во интерес на сите граѓани на Србија, со верување дека на предизвиците може да се одговори само со одговорна политика, конкретни мерки и јасен план за развој.

Тој им се заблагодари на сите пратеници кои учествуваа во дебатата за гласање недоверба на Владата на Србија, додавајќи дека различните мислења се составен дел од демократијата, а она по што се мери секоја влада, како што рече, не се зборови, туку резултати.