Батерија на противвоздушниот ракетен систем „Патриот“ е распоредена на островот Карпатос во југоисточниот дел на Егејското Море, меѓу Крит и Родос, објавија грчките медиуми, додека властите преземаат мерки за зајакнување на воздушната одбрана поради загриженоста од ескалација на тензиите на Блискиот Исток.

Според телевизијата МЕГА, амфибиски брод на грчката морнарица се закотвил во пристаништето Пигадија и го истоварил ракетниот систем MИM-104 „Патриот“.

Објавените видеоснимки прикажуваат воени возила како ги транспортираат компонентите на противвоздушната батерија по главниот пат во областа, пред да се упатат кон претходно одредените локации за распоредување.

Одлуката за распоредување на системот следува по пријавените инциденти со ирански беспилотни летала во близина на британската воена база во Акротири, во администрацијата на кипарските Грци.

Британските власти претходно соопштија дека едно беспилотно летало ја погоди пистата во базата Акротири, но не предизвикало жртви ниту значителна материјална штета. Други две летала кои се приближувале кон базата биле пресретнати.

Грција претходно испрати и две фрегати и четири борбени авиони од типот Ф-16 во администрацијата на кипарските Грци, како дел од сеопфатната одбранбена поддршка за време на тековната криза.