Португалскиот репрезентативец и играч на Ал Наср од Саудиска Арабија, Кристијано Роналдо, е првиот фудбалер кој станал милијардер, објави денес Блумберг.

Според проценките на водечкото американско финансиско списание, вредноста на имотот на Роналдо е 1,4 милијарди долари.

Португалецот ја преминал магичната линија благодарение на продолжувањето на соработката со Ал Наср, како и профитабилните повеќегодишни договори со компаниите „Најк“ и „Армани“.

На крајот на мај, Роналдо (40) го продолжи договорот со Ал Наср до 30 јуни 2027 година за 400 милиони долари.

Иако некои го доведуваа во прашање неговиот натамошен натпреварувачки мотив, трансферот му донесе еден од најголемите договори во историјата на фудбалот и највисока просечна годишна плата на еден спортист.

Саудиските приходи се ослободени од даноци, а договорот, според пишувањата, вклучува удел во клубот и пристап до приватен авион.

Португалскиот фудбалер е член на Ал Наср од 2023 година, а пред тоа играше за Манчестер Јунајтед, Јувентус, Реал и Спортинг.

Богатството на Роналдо е релативно поинакво од она на другите милијардери-спортисти со кои сега се наоѓа во истата класа, бидејќи најголемиот дел од неговата заработка потекнува од плата.

За споредба, најголемиот дел од богатството на Роџер Федерер произлегува од уделот што го стекна во брендот за спортска опрема „Он Холдингс“ (On Holdings AG) како дел од спонзорски договор, покажува индексот на богатство на „Блумберг“.

Легендата на кошарката Мајкл Џордан, пак, заработил помалку од 100 милиони долари во текот на кариерата, при што најголемиот дел од неговото богатство доаѓа од долгогодишниот договор со „Најк“ и уделот во кошаркарскиот клуб „Шарлот Хорнетс“ (Charlotte Hornets) од НБА.