Новиот реисул-улема на Исламската заедница во Босна и Херцеговина е Неџад еф. Грабус.

На седницата на Изборното тело за избор на реисул-улема, одржана во саботата во библиотеката „Гази Хусрев-бег“ во Сараево, сараевскиот муфтија Грабус ја доби поддршката на мнозинството членови на ова тело.

Изборното тело го сочинуваа членови на Собранието на Исламската заедница, членови на Ријасетот, муфтиите, претседателите на мешихатите, деканите и директорите на исламските установи, главните имами и претседателите на извршните одбори на меџлисите, кои со тајно гласање ја изразија својата изборна волја.

На новоизбраниот реисул-улема меншурата ќе му биде врачена на 15 ноември од претседателот на Собранието на Исламската заедница во Босна и Херцеговина, на посебна свеченост во џамијата „Гази Хусрев-бег“ во Сараево, каде што тој ќе положи и заклетва.

Меншурата е свечен документ со кој се потврдува дека одредено лице е законски именуван, односно избран реисул-улема и дека, во согласност со шеријатското право, има овластување да им дава соодветни овластувања на верските службеници под негова надлежност.

Неџад Грабус е роден во 1968 година. Медресата „Гази Хусрев-бег“ ја завршил во 1987 година. Академското образование го стекнал на Факултетот за исламски науки во Сараево, каде што дипломирал во 1994 година, магистрирал во 2001 година и докторирал во 2008 година. Од 1995 до 1999 година ги положил и сите испити на постдипломските студии на Филозофскиот факултет во Сараево, на Катедрата за филозофија.

Од ноември 1994 до март 1996 година работел во Службата за верско-просветни прашања на Ријасетот на Исламската заедница во БиХ, а потоа, од 1996 до 2006 година, на Факултетот за исламски науки во Сараево, каде што на 28 април 2021 година бил избран во звањето редовен професор.

Предавал на Теолошкиот факултет при Универзитетот во Љубљана и бил гостин-предавач на Правниот факултет при Универзитетот во Виена. На Факултетот за исламски науки во Сараево бил ментор на студенти на додипломски, постдипломски и докторски студии, како и член на комисии за одбрана на магистерски и докторски трудови на факултети во Сараево, Бихаќ, Љубљана и Загреб.

Од 2006 до 2021 година ја извршувал функцијата љубљански муфтија и претседател на Мешихатот на Исламската заедница во Словенија. Од 15 септември 2021 година ја извршува функцијата сараевски муфтија.

Соработник е на исламскиот информативен весник „Препород“. Соработувал и со Радиото на Босна и Херцеговина и Телевизијата Сараево. Член е на повеќе редакции на списанија и научни организации во Босна и Херцеговина и во светот.

Најзначајниот проект со кој раководел во периодот од 2008 до 2020 година е изградбата на Муслиманскиот културен центар во Љубљана. Тој бил одговорен за целиот процес – од изборот на локацијата и купувањето на земјиштето, преку изборот на идејното решение на меѓународен конкурс, организиран заедно со Исламската заедница во Словенија и Општина Љубљана, до завршувањето на изградбата, добивањето дозволи за употреба и почетокот на користењето на џамијата на 7 февруари 2020 година.

Објавил значителен број книги, научни трудови, преводи на книги и академски статии, прикази на книги, рецензии и анализи во релевантни домашни и меѓународни списанија. Неговите интервјуа биле објавувани во релевантни медиуми на босански, словенечки, арапски, германски, турски и англиски јазик.

Учествувал и одржал излагања на бројни меѓународни академски конференции, како и на јавни дебати и форуми на кои се дискутирало за прашања поврзани со религијата, образованието, културата, дијалогот, меѓурелигискиот дијалог и религиозната дипломатија.

Зборува арапски, англиски и словенечки јазик.